22. Oktober 2026 Eqqumiitsuliornermut Aningaasaateqarfiup saqqummiuppaa quppersagaq nutaaq aamma
qinnuteqartarnermi aaqqissuussineq ullutsinnut malinnaatinneqartoq nutaaq. Tamatumunnga atatillugu
aamma ammarneqarpoq qinnuteqaateqarsinnaaneq tuaiortumik angalanissamut aningaasaliissutit nutaat Air
Greenland aamma NAPA suleqatigalugit. Eqqumiitsuliortut piffissami sivisunerusumi kissaateqarsimapput
sukkasuumik angalanissanut aningaasaliissutissanik qinnuteqarfiusinnaasumik suliatigut periarfissat nutaat
takkukkaangata atorneqarsinnaasumik. Tamanna assersuutigalugu tassaasinnaavoq saqqummersitsinernut,
attaveqaqatigiiffinnut, nersornaatisinernut, nipilersornissanut allarpassuarnullu tunngasunik suliassat.
Naatsorsuutigineqarsinnaassaaq annerpaamik ullut tallimaannaat suliffiusut iluanni akissutisisinnaaneq.
“Amerlasuutigut nunatsinni eqqumiitsuliortut nunatta nammineq iluani aamma nunani allani
peqataanissamut killilersorneqartarput, qinnuteqarnissamut periarfissat pitussimasarmata piffissanut
aalajangersimasunut, piffissanilu sivisuuni suliarineqartarnerannut. Naallu Eqqumiitsuliornermut
Aningaasaateqarfiup allaffissornikkut suliassanik ingerlatsineq sivikillilersimagaluaraa, siusinnerusukkut
sap. Akunnerinut arfineq pingasunut, ullumikkut ullunut 20 -inut, qinnuteqarfiusussamiit,
aningaasaliissutissat taamaallaat qinnutigineqarsinnaasarput ukiumoortumik qinnuteqarfissat sisamat
aqqutigalugit. Aamma aningaasaateqarfinni allani aalajangersimasunik qinnuteqarnissamut
periarfissaqartitsisoqartarpoq, qinnuteqaatillu suliarineqartarnerat sivisugajulluni.” Taamak nassuiaavoq
Jacob Froberg, siulittaasoq Eqqumiitsuliornermut Aningaasaateqarfimmi.
“Aningaasaliissutissat immikkoortitat pilersinneqarput isumassarsiorfigalugu assersuutigalugu Loftbrúnna
(Silaannakkut ikaartarfik) Savalimmiuniittoq, tassami Savalimmiormiut eqqumiitsuliortut København -imut
angalanissaminnut aningaasartuutissatik matussusertissinnaammatigit, Savalimmiut avataanni
suliassaqartillutik. Nassaassaqarpoq aaqqissuussinernut assingusunik tuaviortumik angalanissamut
aningaasaliissutissanik immikkoortitanik eqqumiitsuliortunut atuuttunik Nunani Avannarlerni allani aamma.
Aamma uagut ukiuni arlaqalersuni oqaloqatigiittarnerni eqqumiitsuliortullu ingerlatsiviit assigiinngitsut
akimorlugit assingusumik aaqqissuussisoqarsinnaanera eqqartortarsimavarput maanni Kalaallit Nunaanni.
Maanna timmisartortitseqatigiiffik Air Greenland aamma NAPA suleqatigalugit siullermeersumik ukiunut
pingasunut atuuttussamik isumaqatigiissusiorsimavugut, Eqqumiitsuliornermut Aningaasaateqarfiup aamma
Air Greenland -ip aningaasaliiffigisaanik 300.000 kr. -inik ukiumut immikkoortitanik Air Greenland -ip
timmisartukkut ingerlaartarfiinut attuuttumik, aammalu NAPA ilassuteqarluni ukiumut 50.000 kr. -inik,
immikkut siunnerfeqartinneqartunik Nunani Avannarlerni allani tikiffissaqarnernut” ingerlaqqilluni
siulittaasoq oqarpoq.
”Eqqumiitsuliortortavut periarfissaqalerunik peqataasalersinnaanernut saqqummersitsinerni, festivalernerni
aammalu suliassatigut attaveqatigiiffinni, tamanna aqqutissiuussissaaq nutaanik attaveqalersinnaanernut
aammalu uagut oqaluttuagut nunarsuatsinni sumiiffinnut allanut apuunneqarsinnaalissallutik. Taamaattumik
tulluusimaarutigaarput angalanernut aningaasaliissutissanik immikkoortitseqataanerput,
ajornannginnerulersillugu periarfissanik iluatitsisalersinnaaneq, periarfissat takkukkaangata” taamak
oqarpoq Jacob Nitter Sørensen, Air Greenland -imi pisortaaneq.
Siullermik aningaasaliissutit immikkoortitat taamaallaat matussutaasassapput timmisartorluni angalanernut
aningaasartuutivinnut, aammalu taamaallaat Air Greenland-ip timmisartorfiini. Nammineq angalanissamut
bilitsimik pisinissamut periarfissaqanngikkaanni, neqeroortitsisoqarsinnaassaaq angallavissamut
namminermut Kalaallit Nunaanni angalatitsivik, assersuutigalugu Grønlands Rejsebureau aqqutigalugu.
Sukumiinerusumik paasisaqarusukkuit attavissaq: Jacob Froberg
mobil: 486950
Inussiarnersumik inuulluaqqusillunga
Jacob Froberg
Siulittaasoq